Apkrūņuosi mani ar ķeizarkrūni, i es topšu teira,
Apsegsi mani ar kluseišonu, i topšu es bolta kai snīgs,
pādejais snīgs
Juoņu naktī,
kod klusuos mūkuos mierst vosora,
eisti vēl naatnuokuse,
gunskurūs sadadzynuota.
Apkrūņuosi mani ar ķeizarkrūni, i topšu es teira,
Teira i namiersteiga,
Kai puče pi bazneicys sīnys, –
Soltys i naruneigys,
Kai tu.
Apkrūņuosi mani ar ķeizarkrūni miršu vaiņuga vītā,
Sorkonys zīdlopys sadegs suopeigā saulisrītā,
Nasabeist, tymā gunī es sadegšu vīna,
Tovā duorzā ni zareņš, ni lapeņa nanūsviļs.