Leta Semadeni
Oda dal chavrer a sia chavra
Minchatant gir'la
silenziusa tras mia chasa
e salüda culla cua da l'ögl ant co ir
Minchatant giasch'la aint illas nüvlas
e sbegla
e'm stüda
sco üna sajetta
Ella sa sfrantunar meis cour
Minchatant voul ella avair meis temp
magliar mias rösas
Sül piz da las cornas
charg'la la stà splendurainta
tilla porta a mai
Luot, luotin
tilla pozza sül glim
sfruscha seis cheu vi da mia porta
Ed eu vez
la preschentscha glüschainta da mia chavra
Il portun resta avert sur not
perche eu nu sa che ch'eu sun
ed ingio e scha
e perche cha la chavra
m'irradiescha e'm perseguitescha
tras il fö da meis dis
Kregždutės = Randulinas: retoromanų poezijos antologija / sudarė Markus Roduner; vertė Vladas Braziūnas, Markus Roduner. – Šiauliai: Saulės delta, 2009. – P. 80, 82;
http://lyrikline.org/index.php?id=162&L=2&author=ls03&show=P....